ബെംഗളൂരു: അപരിചിതമായ നഗരത്തിൽ പുലർച്ചെ ഒറ്റപ്പെട്ടുപോയ യുവതിക്ക് തുണയായത് രണ്ട് അപരിചിതർ. പുലർച്ചെ മൂന്ന് മണിക്ക് ബെംഗളൂരു നഗരത്തിൽ സുരക്ഷിതമായി ലക്ഷ്യസ്ഥാനത്തെത്താൻ സഹായിച്ച ബസ് കണ്ടക്ടറുടെയും റാപ്പിഡോ ഡ്രൈവറുടെയും കഥ ഐശ്വര്യ കല്പർജുൻ എന്ന യുവതി ഇൻസ്റ്റാഗ്രാമിലൂടെ പങ്കുവെച്ചതോടെയാണ് സംഭവം പുറംലോകമറിഞ്ഞത്.
വിമാനത്താവളത്തിൽ നിന്നും കാടുഗോഡിയിൽ ബസിറങ്ങിയ ഐശ്വര്യക്ക് അവിടെ നിന്ന് താമസസ്ഥലത്തേക്ക് പോകാൻ ടാക്സികൾ ലഭിക്കാത്തതാണ് പ്രതിസന്ധിയുണ്ടാക്കിയത്. മൂന്ന് കിലോമീറ്റർ ദൂരത്തേക്ക് മാത്രമായതിനാൽ പലരും യാത്ര നിരസിക്കുകയായിരുന്നു.
കാവലായി കണ്ടക്ടർ, തണലായി റാപ്പിഡോ ഡ്രൈവർ
യുവതി ഒറ്റയ്ക്കായതിനാൽ തനിക്ക് ടാക്സി ലഭിക്കുന്നത് വരെ ബസ് കണ്ടക്ടർ കൂടെ നിന്നുവെന്ന് ഐശ്വര്യ വീഡിയോയിൽ പറയുന്നു. ഇതിനിടെയാണ് ഒരു റാപ്പിഡോ ഡ്രൈവർ സഹായവാഗ്ദാനവുമായി എത്തിയത്. പണം എത്രയാകുമെന്ന് ചോദിച്ചപ്പോൾ, “അതൊന്നും സാരമില്ല, നിങ്ങൾ ലൊക്കേഷൻ മാപ്പിൽ കാണിക്കൂ” എന്നായിരുന്നു അദ്ദേഹത്തിന്റെ മറുപടി.
താമസസ്ഥലത്ത് സുരക്ഷിതമായി എത്തിച്ച ശേഷം വാടക എത്രയാണെന്ന് ചോദിച്ചപ്പോൾ അദ്ദേഹം നൽകിയ മറുപടിയാണ് ഐശ്വര്യയെ ഏറെ സ്പർശിച്ചത്. “സമയം ഒരുപാട് വൈകിയിരിക്കുന്നു, നിങ്ങളെ സുരക്ഷിതമായി എത്തിക്കുക എന്നത് എന്റെ ഉത്തരവാദിത്തമാണ്. ഇത്ര രൂപ വേണമെന്ന് ഞാൻ പറയില്ല, നിങ്ങൾക്ക് ഉചിതമെന്ന് തോന്നുന്നത് നൽകിയാൽ മതി,” എന്നായിരുന്നു ഡ്രൈവറുടെ വാക്കുകൾ.
‘എല്ലാ പുരുഷന്മാരും ഒരുപോലെയല്ല’
“രണ്ട് അപരിചിതർ ചേർന്ന് പുലർച്ചെ 3 മണിക്ക് ഒരു പുതിയ നഗരത്തിൽ എനിക്ക് സുരക്ഷിതബോധം നൽകി. ഒരു സ്ത്രീ എന്ന നിലയിൽ ആശ്വാസകരമായ നിമിഷമാണിത്. എല്ലാ പുരുഷന്മാരും ഒരുപോലെയല്ല,” എന്ന കുറിപ്പോടെയാണ് ഐശ്വര്യ വീഡിയോ പങ്കുവെച്ചത്.
സമൂഹമാധ്യമങ്ങളിൽ വൈറലായ ഈ വീഡിയോയ്ക്ക് താഴെ നിരവധി പേരാണ് അഭിനന്ദനങ്ങളുമായി എത്തുന്നത്. ഇത്തരം ചെറിയ പ്രവർത്തികളാണ് മനുഷ്യത്വത്തിലുള്ള വിശ്വാസം കാത്തുസൂക്ഷിക്കുന്നതെന്ന് പലരും കമന്റ് ചെയ്തു. നഗരങ്ങളിലെ സുരക്ഷയെക്കുറിച്ച് ആശങ്കപ്പെടുന്നവർക്കിടയിൽ ഈ സംഭവം വലിയ മാതൃകയാകുകയാണ്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
